حميد

الجابرية ..


كان ضحوية ...وكنا نسند في المحروت
وفجأة يدوي مكبر صوت
قال الريس مار بي فوقنا
إن شغلتنا قلعنا عروقنا
فكينالو حبل واسوقنا
وإنماسكنا نطمن روقنا
قمنا جميع الحلة مرقنا ...
البيشوفنا يقول واشوقنا
كان ضحوية ... وكان عين شمس الله قوية
وكان الريس في عربية ...
واقف طولو تحت شمسية
هللنالو ... هلجنالو ...لوحنالو بالطورية
فرَّ عبايتو وهزَّ عصايتو ...
وهزو بنادقن الضابطية
صفقنالن صفقة قوية
زغردنالن ... يويا أيويا
هدن عندنا خمسة دقائق
قدمنالو كتاب الله ...درقة وسيف ...
تبروقة هدية قفة تمودة وفاس دهبية
وكنا قبيل بيتنا النية ...
بين بيتين علينا اليافطة ...
اليافطة أم زيقا دمورية
وانعبينا هتافا واحد :
(الجابرية تحيي الثورة ...
دايرين بوسطة ومدرسة وسطى
الشفخانة وسوق منضبطة)
قام الريس روح باسم
وقام خاطبنا بنهج الثورة الصارم وحازم
أما اللازم من شفخانة ...
التعمير بالعون الذاتي
أما اللازم من شفخانة ومدرسة وسطي
التعمير بالعون الذاتي....
إلا البوسطة دي ينظر فيها
أما السوق ... السوق منضبطة
وبالتأكيد ... للتجار الأسعار واضحة
للمستهلك باينة وواضحة ...
جاملتوهن تبقى الغلطة
وإنكفينا رفعنا إيدينا ...هزيناهم بالتأييد:
(لا تفريط في قوت الشعب ...
سحقا سحقا للرجعية
الجابرية ضراع الثورة ...
بالانتاج حا نبني بلدنا)
كانوا في جيهة وإحنا في جيهة
هن ينهببو بالكابات ...
وما همانا الصيف وعرقنا
فات الريس وإنفرتقنا
إنفرتقنا على الجابرية
كنا ببنضم وما صدقنا
الجابرية تجيها البوسطة
الشفخانة ومدرسة وسطى
قلنا يا ريت لو وصلوا فطور
وإنحزمنا ضبحنا التور
كنا أقلا ضمنا النور
أو يا ريت لو زدنا الصفقة ..
وعاش ويسقط ويويا اليويا
كنا أقلا ضمنا الموية
كنا بننضم بي إيدينا ...
(دا أحسن ريس مر علينا)
من الله خلقنا وشفنا خلقنا ...
دا أول ريس زاتو يجينا
وكونو يجينا يقنب بينا...
يشوف البينا .... كفاية علينا
آ الجابرية يجوكي الحكماء
آ الجابرية تواصلي البرة
آ الجابرية ولادك تقرا
نمشي الليلة نصاقر الرادي
نمشي الليلة نحضر النشرة
كنا نرجع في كلماتو
إلا في ستة من الجابرية ...
قالوا تعبكم خارم بارم
يذهب حاكم خلف الحاكم
والجابرية تظل في حالها ...
حلة حياتها تسر الظالم
صدفة تموت وتحيي اطفالها
لا جلكوز لا تقرا رسالة
ولا راح يطلع منها عالم
ما بينصفكم إلا ضراعكم
عبوا ضراعكم يا رجالة
خلو بصركم دغري وسالم
حكم العسكر ما بينشكر
كلو درادر ... كلو مظالم
ما هو قدركن تحيو همالة
مقصودين والقاصد فاهم
قاطعناهن ... حاربناهن تميناها البينا شتائم
حالتن أحسن ناس في الحلة
إيدا نزيهة ... عقولا نبيهة
قلنا بيعرفوا ... قلنا فواهم
يطلعوا فالصو وقطاع رحمة
عينة شماتة وخارم بارم
وإحنا القصر واثقين فيها
وقاطعناها معاهم جملة وقاطعناهم
صاروا في جيهة ... ونحن في جيهة
ومر اليوم ... الشهر ... الحول
والجابرية بلد في حالا
قواسي شيوخا ... مآسي أطفالا
عذابات ناسا ... حلة تعافر ومقطوع راسا
من القراصة ولي قراصا ...
حلة تعافر ومقطوع راسا
عشرين كيلو من الجابرية ...
صبية تساسق بي كراسا
آ الجابرية عذابك فينا ...
لاك القرية ولاك مدينة
وفد في وفد يقوم ويجينا
بوسطة ... دايرة دراسة وإجراءات
عون أمريكي وقرض ألماني وحاحاءات
وحد ما نشوفلنا مسعولين ...
مسعولين أو خواجات
نجري نلم قدحاتنا عليها ....
ترطن ترجع زي ما جات
الشفخانة وعايزة دراسة ...
مدرسة وسطى وإجراءات
لما المطوحة طالت بينا
إنذكرنا العون الذاتي
إنحزمنا وقلنا برانا ... نبني نقوم للشفخانة
طوبة في طوبة في طوبة وقومناها
ويوما التمت جات السلطة ...
عربي وعجمي ومرة رطانة
الشفخانة دا ماهو بكانا
عاك يا تلتلة هاك يا ورطة
وغصبا عنك يا الجابرية ...
وغصبا عنك يا أحوالا
حمياتا وموت أطفالا
وحمرة عينكن يا رجالة
قوة انشكت بين النقطة
وفي الجابرية تحوم الشرطة
هووا كلاب الحلة وصنو
ومن يوم داك ما شفنا الستة
وفد الحلة السافر جانا ...
قال إنأكد شاف الخرطة
ونحن بدل نبني الشفخانة ...
إنسرعنا بنينا النقطة
الشفخانة دا ماهو بكانا ...
وكانت غلطة انقلبت ورطة
إنفاهمتو مع المسعول ؟؟
إنفاهمنا مع المسعول
وقال حا يبني يقوم للشفخانة
أو يدفعلنا حق الطين
مع إنو النقطة وكت بنيانا ...
قومتوها بلا زنزانة
وفي تقديرنا كلام معقول
كونو يقوم لي الشفخانة حاجة تضحك
محرقة ... هانة إنتو تقيفوا مع المسعول
وألا الكنتو تقيفوا معانا؟
قلنا خفنا نصد الجاي ...
خفنا نفشل باقي الخطة
هو فضل جاي ؟ ... هي فضلت خطة؟
وانفرتقنا على الجابرية ....
وانعلقنا تجينا البوسطة
ومدرسة وسطى والشفخانة قصاد النقطة
تجينا ... تجينا ... وما أنيقنا
ناس إنولدو ... وواحدين ماتوا
لما الريس ودوشتو فاتو ...
فات العسكر وجو الأحزاب ...
بعد خراج أرواح وعذاب جو الأحزاب
ونفس الوجع اتجدد تاني
ونفس الحلم الراح تحتاني
حتلناهو ... جمعنا رفاتو
نفس اليافطة في نفس الحتة :
(الجابرية تحيي الشعب
دايرين بوسطة ومدرسة وسطى
والشفخانة بديل النقطة)
فينا انكلم شيخ الحلة
صنقع ...دنقر ... صلي وسلم
وكانوا كلاب الحلة يهووا
وقال كلمتنا تكون فد واحدي ...
شان ننقوى وما ننزلا
شان مشهادنا وعدل الحلة
نحن نفوز شيخ البلة
وزاد هوهيو ... كلوب الحلة
وبعضنا عارض ... رد وفاوض
شيخ الحلة قام حمسنا ...
بلة الحمش الزول ما دلة
أول فاهم وقبله ولدنا ...
وراح يحكمنا بشرع الله
هو .. هو ... هووا كلابنا
لما أستغرب شيخ الحلة
وإنفرقنا على الجابرية
إنفرقنا ويوم الليلة جمعنا عموم الحلة
شيخ الحلة قرأ القرآن ...
صنو كلاب الحلة وهووا
وبلة إنقدم سمَّ وصلَّى ...
صنو شوية ... وهو هو هووا
قام وإنكلم ... عن ينكلم كان ينقسم
النسوان الجاي تتهامز
الصبيان الجاي تنغامز
وكان ينبسم ... وكانو كلاب الحلة يهووا
شكَّر وشتَّم ... هو هو هووا
حلَّل وحرَّم ... هو هو هووا
هوَّد وسابنا ... وفات ودانا الآخرة وجابنا
قاطعناهو وصوتو إنوطَّا
أصلاً واطي وتاني إنوطَّا
دايرن بوسطة ومدرسة وسطى ...
والشفخانة بديل النقطة
التموين وزيادة الحصة ....
كهربة موية وسوق منضبطة
بلة انبرع وقال ببنيهن ...
هو هو هووا كلابنا واستغربنا قبل بالمرة
لامن نهتف ترسى كلابنا
لامن ينضم بلة يهووا
بلة انحمس وقال بسقينا ...
وبي إذن الله يضوى الحلة
هتف الشيخ وهتفنا وراهو :
لا تبديل لشرع الله .... هو هو هو
لا ولاء لغير الله ...... طاء طاء طاء
عاش الفارس أمل الحلة
بلة الطاهر علي حسب الله
بلة الطاهر علي حسب الله
كبَّر فينا وقام إندلي ...
ولسة كلاب الحلة يهووا ...وزاد هوهيون
كبشا ضاع من مرحاتو وصاقع باع
بلة الطاهر علي (بلاع)
كانت أول مرة نشوفو ...
يومنا الشفنا اللاندكروزر اللونا مخطط
والبنوت الراسا مربط .... التنبوبر
لوري مكوَّش أقمشة ..سكر ...
حتى الفوفو ... عتل تؤجر
وأمحي المنكر بي معروفو
بلة الطاهر علي بلاع ...
أكرمناهو .... أكرمن ضيوفو
يشبه مرت الشيخ في وشيهو ...
لولا الدقن الدشدش صوفو
بلة خبارك ما بتشبهنا وعامل زولنا
تاني نقول الزول (...) برانا نغيير قولنا
إلا كبار الحلة بقولوا ... بلة دا هولنا
لة دا أصلا من ها الحلة
إلا أنربى وقرأ في الخارج
ورافق جدو الفتح التركي
وسيرتو انقطعت في المهدية
ومرة سمعنا أستوطن برة ...
وقام إنزوج من مصرية
جابت علي ... علي جاب الطاهر
حتى الطاهر خلَّف بلة
جدو انشيطن أخير ما لانا
بلة أنسركن جاء وبرانا
أقرب واحد لي حاج بلة ....
أقرب واحد شيخ الحلة
بلة الطاهر علي حسب الله
أول مرة يصلي معانا ...قدمناهو وقم أمَّانا
صوتو مرخرخ لامن يقرأ
يقرأ ويقطع .. زي البطرا
لامن يركع جسمو متختخ
عند السجدة سجودو ممخمخ
شيخ الحلة بقول في امرو
زول غرقان في الدين من عمرو
ستة سنين قابض في جمرو
وما فكاه طريق الله ...
صوتو وِدِر من كترة ذكرو
وجسمو التختخو شدة صبرو
قلنا حقيقة الزول بي عذرو
وفتنا قناعة ومانا قناعة
إلا الستة الصارو جماعة
قالوا دا زول تربايته مياعة
ما يشبهنا رفعة وضاعة
زول زول دنيا ودنيا صياعة
قصة دينو ودقنو بضاعة
وإحنا أصواتنا ... يا غما مضاعة
يا غما جهالة وناس متباعة
وفي الحالتين آمالنا مضاعة
وخارم بارم كونها بوسطة ...
ومدرسة وسطى والشفخانة وموية ونور
كونو يجينا دا ما منظور
وزيادة الحصة ... الزول زول سوق
زول من جدو يلف ويدور
ويا الجابرية دا مطلب عادل ...
كونو تطيبي ... تكتبي تقري
ضوك يشلع ... دشك يرشع
ونحن دفعنا ضرئب بدري
ولسه بندفع ... لسع ... لسع
بس يا جماعة ... إن قضينا حياتنا تباعة
صنيت رادي ... وقول في الفضي
خوفنا نقوم ما نلقى أراضي
ونحن أساسنا وراسنا زراعة
والجابرية إن دايرة شفاعا
ما بيشفعلها إلا ضُراعا
عبو ضراعكن آ رجالا ...
وخلو بصركم دغري وسالم
عبو ضراعكن آ رجالا ...
شيخ الحلة أضلَّ وضلَّ
وأسألوا بُرَّة وحاجة السُرَّة
عن التيبان وحكاية الصُّرة
اللمت بلة وشيخ الحلة مع شرع الله
والناس ديل العارضين برة
جربناهن كمين مرة
تاني نجرب شان ننضرَّ؟!
ويا الجابرية معاكي سلامة ...
كان الفوقك ما فات مرة
كان كلماتن ناشف ريقا ... وكانت مرة
إلا حقيقة ... غلبنا نطيقا ...
وين في الصرمة ... وقل القدرة
سكتناهن بس ما صنو
وقاطعناهن تاني المرة
وبلة طريق الناس وخيارا
فوزناهو وجانا زيارة
كرمنالو التور وعرضنا ...
وخليناهم برة الدارة
دايرن بوسطة ومدرسة وسطى ...
موية وكهربا والشفخانة ...
زيادة الحصة وسوق منضبطة
وصدو كلاب الحلة يهووا ...
ينضم بلة يهووا معاهو
نهتف نحن يزيد هوهيوا
مافي شهر جاتنا الخرسانة ...
جانا السيخ ... الطوب ... الرملة ...
جا الأسمنت شكارة شكارة
عديناهن ألف شكارة كرمنالن خيرا جانا
وكل كلاب الحلة الهوَّن ...
طفشناهن بالجبخانة
وفي صنانا تدودي الزانة
إنغالطنا كتير في بعضنا ...
أولى المدرسة واللا البوسطة ؟
أولى المدرسة والشفخانة
الشفخانة محل النقطة
ونان النقطة؟...نحن أهالي ... ودنا صافي
بينا معزَّّة جرائم مافي ...
وما بنحتاج لي شرطة ونقطة
تحصل علة في شيخ الحلة
نحن الإيدنا بنت للنقطة ...
والجيرنا زبالة أطيانا
ناس السلطة إن دارو النقطة ...
تمشي بكان أرض الشفخانة
وما طالبانا خلاف زنزانة
مدرسة بوسطة ... مدرسة بوسطة
ستين طلبة وعشرين أوسطى
شغالين ما ملو سخانة
مدرسة بوسطة ... وقلنا غُنانا
يا الجابرية الله أدانا...
حاج البلة المبروك جانا
جاب المدرسة جاب البوسطة
وبكرة يرجع للشفخانة
نصحى نصابح موية الدُّش
نمسي نلاقي الضو عمانا
مدرسة بوسطة ... مدرسة بوسطة
وتاوق ... وتاوق ... وتاوق ...تخ
وفجأة تبين في السطح الخرطة
وكب تنتصب الميضنة ...أخ
أخ من حظك يا الجابرية
سابع جامع في الجابرية
وصدو كلاب الحلة يهووا ...
أخ يا الناس الحالن قُطي
في البلد الحظها فاجع
بق يا الصاح الماك متراجع
حرِّق دبش الدنيا الغلطة
بق وانفرتق في الجابرية
بق في أرحامنا في شافع نافع
ترفعو أمو في حيطة الجامع
يكتب يسقط دجل السلطة
ويسقط بلة وشيخنا التابع
وكشفناك وكشفنا الخطة
تحيا كلابك يا الجابرية
ويحيا ضراع الزيتن طالع
غُلب يصارع مر الواقع
يحيا ترابك والطورية
الجابرية تحيي الشارع
دايرين كهرباء دايرين موية ,...
دايرين سلطة وسوق منضبطة
دايرن هسة زيادة الحصة ..
الشفخانة بديل النقطة
ودايرين بوسطة ومدرسة وسطى
آ الجابرية تصارع الواقع